لا تعاير الفلاح… هو الأصل

بقلم: اكرام المحمدي
الفلاح هو الي يزرع ويتعب من الصبح لليل يسگي الگاع يصبر على حر الصيف وبرد الشتاء ويتحمل كل التعب حتى بالنهاية تكون سفرتنا متنوعة بكل الخضراوات والفواكه   بس للأسف هواي من الناس من يصير عدهم بيت راقي أو سيارة حديثة أو وظيفة أو شركة يبدون ينظرون للناس بنظرة استعلاء وينسون تعب الفلاح الي يوصللهم أبسط وجبة على السفرة

اليوم إذا ابنك حب بنت فلاح لا تخلي الغرور يسيطر عليك وتعتبر الموضوع انتقاص من “مقامك” بالعكس هاي البنت تفتخر بأبوها الفلاح وبعرقه لأن الغده الي تاكله من باميا وطماطة وتمر وغيرها كله من تعب إيدين هالفلاح

السيارة والبيت والوظيفة ممكن تجي وتروح بس انت بحاجة لكل ثمرة سزرعها الفلاح حتى تسد جوعك بيها الأصل  ماكو شي ينطيك الحق إنك تقلل من شأن الناس أو تعايرهم بالعكس احترام الفلاح  هو احترام للحياة نفسها ودليل على إنسانيتنا

فلا تستنكف ولا تخلي الغرور يعميك ترى الدنيا تدور